Po mirë, po Karl Lagerfeld vetë, ç’mendim do kishte për Met Gala

Tema e Met Gala këtë vit ishte pikërisht Karl Lagerfeld. Jo Lagerfield (siç e shqiptojnë disa), por Lagerfeld. U pyetën të ftuarit, i madh e i vogël, ç'mendim ke ti për Karl dhe pse pikërisht ke veshur këtë lloj dizajni? Epo disa thanë është krijimi i Karl për Chanel, jo po ka perla, jo po tylëra, jo po tweed, e jo po lule.

Po mirë, po vetë Karli, ç'mendim do kishte për gjithë këtë zallamahi amerikane?

Le të marrim Jennifer Lopez, e cila veshi një krijim të Ralph Lauren (më amerikan se kaq nuk bëhej), ku kishte zbuluar bukur muskujt e barkut.

Fustani qe i gjatë punuar me dy ngjyra. Rozë petalesh dhe e zezë mat. Si gjasme franceze, kishte vënë një kapele dasmash britanike.

Muza e vërtetë e Karl-it, vajza e Johnny Depp dhe Vanesaa Paradis, Lilly, nuk ishte fare e pranishme në Met Gala.

Dua Lipa kishte zgjedhu një prej krijimeve ikonë të Karl, fustanin e nusërisë që veshi Claudia Schiffer ne '90 - tën. Jam e sigurt që Karli do i thoshte të mbante edhe kapelen, si dhe ta vishte në dasëm, jo në Met.

Lizzo veshi një krijim tjetër të Karl, por me pak modifikim, kuptohet.

Kim-i vetë preferoi t'i bënte tribute vetes së saj. Me këtë tipologji "veshjeje" u shfaq në revistën Playboy vite më parë. U justifikua se ishte frymëzuar nga Karl-i për perlat. Po perlat qenë të Chanel-it moj Kim!

Cardi B zgjodhi look-un e Karl me flokët gri, një tip këmishe me kravatë dhe sarafan me lulet Chanel.

Kendall, si modele që ka punuar me Karl, duhet ta dinte më mire si do e vishte ai në këtë event. Me lini t'iu kujtoj koleksionin ku mori pjesë modelja:

Përshëndetje Chopette!

Ashley Graham u vesh me një version të këtij krijimi nga Chanel. Nuk është se kishte dalë nga tema, por mendoj që Karl do t'i kishte sugjeruar diçka më minimaliste.

Karl-i ishte gjerman, strikt dhe njeriu i rutinës së përditshme. Nuk pinte kafe, nuk dilte me miqtë shpesh, vishte të njëjtën këmishë nate, si xhaketat e tij ishin Dior. Vetë ai mbante xhinset e firmës së tij, një xhaketë tip dirigjenti, por më casual (Dior), këmishë e kravatë.

Tek Chanel ai mbajti gjallë trashëgiminë e Madame Coco, sigurisht duke integruar dhe elementë personalë. Por baza (perlat, copat, dizajnet, prerjet, trashëgimia) qe tërësisht e Coco Chanel, jo e tij. Ama personazhet publikë, që shkuan për të nderuar Karl Lagerfeld, hapën google dhe shkruajtën "ç'të vesh në Met Gala, që të dukem bukur me Karl Lagerfeld?". Të parat foto që u shfaqën ishin koleksionet e Chanel. Pastaj prapë Chanel, pastaj ndonjë Fendi. Jo po ja se ashtu ishin perla dhe kostume me kravatë. Karl, po ti ç'do thoje?