Marsela Çibukaj fitoi Këngën Magjike. Po veshja e saj çfarë çmimi mori?

Marsela Çibukaj konkuroi këtë vit në Këngën Magjike, me këngën e titulluar "I paftuar". Konkuroi dhe fitoi. Një skuadër e tërë u mor me tekstin, muzikën, kompozimin, realizimin, e deri tek veshja. Që në natën e parë që këndoi Marsela, veshja dhe look-u i saj i veçantë, më kujtuan Michael Jackson tek klipi "The thriller". Flokët me balluke, stiluar me pak onde, të japin idenë e "wet look-ut" të Michael.

Xhaketa e famshme lëkurë e Michael, që u shit për qindra mijëra dollarë, ka dy ngjyra. Baza është e kuqe ndërsa filetot e zeza. Është punuar me tegela zbukurues tek pjesa e shpatullave dhe supeve, si dhe tek mëngët. Michael kishte veshur kostum, ndërsa Marsela e ka sjellë në një formë tjetër.

Pardesyja e gjatë, me jakë të madhe "vintage", krijon një balancë të këndshme midis xhaketës së motorristit dhe pardesysë klasike Burberry. Prerja është konceptuar të vërë në pah supet e zgjeruara dhe belin e konturuar me rrip. Për të mos prishur gjatësinë e siluetës, rripi është konceptuar në të njëjtën ngjyrë dhe copë si pardesyja-fustan.

Pjesa fundore vjen ana e majtë më e gjatë se e djathta, nuk e di nëse ka qenë e qëllimtë apo aksident, megjithatë nuk duket keq. Është si një detaj më shumë, i cili e bën pak më "easy". Por ky është një kompeticjon ku lejohen dhe eksperimentet. Madje, është më mirë të provosh dizajne skenike dhe të heqësh dorë nga veshjet që mund t'i veshësh përditë. Është rasti të kontaktosh stilistin e preferuar dhe t'i thuash "çmendu" me veshjen time. Ose të paktën "çmendu me karar".

Realizimi, përshtatja me këngën, zgjedhja e copës si dhe përshtatja me trupin, janë realizuar më së miri. Mendoj se i meriton 10 pikë nga 10. Marsela, e fitove dhe kompeticjonin e veshjes!