Në formë me Stelën: 11 sugjerime për Aulona Mustën

Aulona Musta na ka futur të gjithëve në punë të kujdesemi për trupin dhe dietën që konsumojmë. Vetë ka trup të rregullt dhe të tonifikuar. Me pak fjalë, i shkojnë shumë lloje dizajnesh, që nga ato avant-garde e deri tek klasiket. I pëlqejnë fustanet e ngushtë e të shkurtër, doemos me linjat që ka, nuk habitem.

Është diku tek 1.70m (nëse e mbaj mend mirë) dhe si formë trupi i përket orës së rërës. Flokët i mban bjondë (me hijezime), edhe pse i pëlqejnë të kuq. (Unë votoj për ngjyrën lajthi, tonalitetin natyral të saj). Sot dua ta ftoj të jetë “Në formë me Stelën” dhe me 11 sugjerimet që kam për të.

Për emisionet televizive, tonaliteti i “off white” do t’i rrinte për mrekulli. Dizajni i Roksanda, me prerjen asimetrike, do ta bëjë të duket më e gjatë dhe më moderne. Një zonjë me sharm!

Jumpsuit-i më lart do ishte zgjedhja ime e parë për eventet e mbrëmjeve të modës. Shkon më së miri me trupin e saj të rregullt, si dhe i vë në pah dekoltenë elegante.

Për ditët e dimrit, kur ka takime pune, do t’i rekomandoj pantallona lëkure dhe xhaketë dopiopet. Për më stil, do doja që pantallonat t’i vishte me çizme.

Për të shtunat paradite, ose brunch me mikeshat. Nuanca e kuqe me jakën oversize të bardhë, bëjnë një kontrast po aq të bukur sa bardhezi-ja.

Nga trendi i ri i këpucëve me platformë, do doja ta shihja me çizme me kontrast. Dhe natyrisht kostum i qepur në perfeksion, kombinuar me golf ose këmishë.

Nuancat camel dhe e zezë bashkë, bëjnë gjithkënd të duket shik. Ky fustan vishet që nga mëngjesi e deri në darkë. Opsioni i buzëve të kuqe për mbrëmje është detaj i lezetshëm.

Çantën Staud do ia sugjeroja për ta kombinuar me veshjet e zeza. Detajet e floririt janë qershia mbi tortë!

Kur del me Amarën dua ta shoh “all denim” (e gjitha xhins). Casual, por me stil.

Për eventet Gala. Nuk dua t’i sugjeroj asnjë fustan të shkurtër, se e di që ato i ka merak vetë. Aulonën e shoh shumë më tepër nga ana klasike e medaljes, me pak tendencë nga casual.

Kostum me tre pjesë, për ato emisionet kur do të befasojë me look-un. I shton piper të kuq mbrëmjes me një dizajn të tillë!

Fustan i trikotuar për punë ose mbledhje. Ka pamje të zakonshme, por kombinuar me çizmet e duhura, bëhet për javë mode.